美聯儲局停止加息，小心樓市反彈

　　我根據自己多年經驗，對美國利息有一個睇法，就是每當美國總統大選，在選舉前一年就開始減息，再之前三個月就停止加息，根本冇人同意我的睇法，我只是自話自說。在這幾個月，偏向美聯儲局繼續加息的人多於停止加息，香港樓市亦在這個陰影下不斷下跌，昨晚美聯儲局議息是非常關鍵，減唔減息並不是最重要，只要放出減息訊號，但如果繼續加息就大件事，股樓都會繼續冧。

　　我真的不明白，美國欠咁多國債，而佢自己又可以做決定，點解要加息，每年所付利息超過1萬億美元，多過每年8千幾億的美國國防預算，有人話，美國要維持強美元，所以要加息，如果美元真係咁強，唔使畀咁高息，甚至負利息都會有人買美債，以前買美債的人不是貪圖利息，而是安全性，現在則掉轉講，美債是有一定危險性，如果不是咁高息，真係唔會有咁多人買美債，而美債的危險性是美國太強，美國違約都唔知點追。

　　美國停止加息，代表一個時代終結，代之而起的是減息時代來臨，其實，今次加息期都未夠一年，就要匆匆落幕，由此可見美國是自己頂唔住高息，而減息是支持香港樓市三個條件之一，其餘兩個是撤辣與銀行放貸，今次雖然是半撤辣，但放寬專才稅，比撤辣更有效，至於銀行放貸，唔通銀行唔做生意，否則一定會借錢畀人買樓，而國家金融管理局下星期三來港與香港銀行開會，目的是如何振興香港金融業，維持香港是國際金融中心地位，做得金融中心，其中一個條件就是放貸，在三個條件都朝向正面的一方走，樓市反彈可期，不過，要消耗地產商庫存，相信要一段時間，樓市暫時很難大升，但能夠保持平穩就於願足矣。