2023.03.03 初心（生命篇） 2023.01.01 初心（抗疫篇） 2022.07.03 初心（特首篇） 2020.11.09 初心（序） 五、四、三、二、一 … 新年快樂！！ HAPPY NEW YEAR！！
自
2021 年起，每年元旦嘅零時零分，我【
珍惜香港 】都會準時响呢個專欄度，率先為大家獻上新年祝願，今年亦唔例外。其實我有啲好奇，究竟有冇朋友或網友，真喺會响度等我出文？我諗就算有，都只會喺果
寥寥幾位 ，再加上香港現正步入復常，恐怕大家都已經出哂去慶祝。不過對我嚟講，深夜出文，寧靜，反而更啱氣氛。
今日呢篇文章嘅主題，原本叫《初心（抗疫篇）》，屬《
初心 》系列第三篇，早幾個月前就已經想寫。不過惰性作祟，拖下拖下，再加上當時風頭火勢，有啲嘢，你點寫人地都唔會明，到一切明朗化之後，嚟一個馬後砲反而仲好。結果拖到年底，就索性同《新年祝願》夾埋一齊寫。所以你地見上面個
PULL-DOWN ，都仲喺保留住（抗疫篇）呢個主題。
死守嘅意義 今次新冠疫情，足足持續咗三年，我見部份親友，响早期就已經有抗疫疲勞，對呢隻病毒嘅心態，由初期嘅恐懼，逐漸變成渴求，即喺坊間流行講嘅所謂「
早中早享受 」。不過亦難怪嘅，因為三年，真喺好長，但呢種心態，其實都幾危險。香港經歷過
SARS 之後，港人傳承咗對病毒嘅恐懼，所以响新冠疫情爆發初期，大家都好自律，自動自覺帶口罩同保持社交距離，我地頭四波之所以過到關，呢個可以話喺關鍵因素。但如果由得呢種「早中早享受」嘅心態傳承落去，唔知幾多年後，再有全新病毒來襲嘅話，到時候，都真喺幾大鑊。
面對疫情，我同我屋企人，截至今時今日，都仲喺行緊「死守模式」，即喺謝絕一切非必要嘅面對面應酬，除工作須要外，唔會响屋企以外用餐。社會上好似我呢類人，應該所餘無幾。記得半年前，我同朋友講，話我呢種仲喺堅持緊防疫嘅死守派，將會成為被歧視嘅少數。當時佢地唔知我講乜，直到三個月前，社會輿論熱血沸騰，紛紛向政府施壓要求復常，成個社會氣氛就開始改變。你周遭嘅親友，已經如常外出用餐，如常聚會，如常去外國旅遊，而你就仲鎖住自己响個窩居度故步自封。人地約你出嚟食飯，你拒絕，再約，再拒絕，你拒絕多幾次，人地嘅反應就會喺：使唔使呀？！
信不信由你，
我呢方面嘅預言 ，好少唔應驗。其實我用「歧視」一詞，唔喺最準確，且恐怕會得罪唔少朋友，但我又真喺諗唔到有更貼切嘅詞語喎。因為呢種歧視，跟一般人嘅理解唔同，對方唔會覺得自己歧視你，甚至反而認為喺你歧視緊佢地添，你話大唔大鑊？記得曾經同朋友講開我堅持死守嘅原因，我話，只不過喺保護自身同屋企人啫，你估我得到乜嘢回應？佢話，咁你可能認為果啲冇死守嘅人，冇保護好自己同屋企人啦！真喺吹脹。所以我奉勸各位死守一族，千祈唔好談及自己點解要死守，你講乜都死。如果你話，因為屋企有個八十幾歲嘅老人家，又或者半歲嘅小 B 之類，人地會點諗？呢個世界，又唔喺淨得你有老人家同小 B，其他人都覺得冇問題，唔通你嘅就矜貴啲？所以自此以後，每當我拒絕人地嘅邀請果陣，都會解釋話，自己仲想繼續保持「新冠處男」嘅身份，所以唔方便外出。你咁講，人地極其量只覺得你有怪癖，亦冇嘢可以再追問你。
其實，我堅持死守，仲有一個好重要嘅意義，就喺保住自己抗疫嘅初心，免得家人同下一代，淪入「
早中早享受 」嘅心態，所以死守本身，亦可以話喺一種修為。宏觀事物，變幻從無間斷，守得住初心嘅人，先至有能力以堅定嘅基礎標準，睇穿當中嘅因果關係。可惜呢種人，往往都喺好孤獨。周遭嘅人心陸續變質，佢見證著呢啲變化嘅因果關係，但無奈有啲嘢，喺注定咗要發生，惟一可以做嘅，就喺獨善其身。
初心喺不變基石 可能你地會話，呢個世界，喺不斷進步，人心都喺一樣，所謂初心，只不過喺墨守成規嘅借口啫！咁我想反問大家，你地究竟用乜嘢標準，去衡量果啲所謂改變，喺進步，定喺退步？會促進發展，定喺帶嚟災難？我嘅答案好簡單，呢個標準，咪就喺初心囉！正確嘅初心，喺承拓住一切改變嘅不變基石，堅守著初心之下嘅改變，先至會帶嚟進步同持續發展。
正如我响《
特首篇 》裡面指出，
保障受治者嘅生命同財產 ，就喺法治嘅初心，即喺法治嘅基礎同底線。無論社會點樣進步，法律制度如何演變，呢件基石，絕對唔可以動搖。所以五年前
潘曉穎被殺案 ，至今兇手依然逍遙法外，一定喺法治問題，唔喺政治問題。呢個基礎原則，唔會因為發生過啲乜嘢反修例事件、乜嘢黑暴事件而有所改變，分別只不過喺變咗質嘅人心啫。正如台灣
韓國瑜 ，選佢做市長又喺你，公投炒佢魷又喺你；再回帶睇返當年英國公投通過脫歐，
瞓完一覺就話後悔 ；今日你 BUY
卓慧思減稅 ，舉佢上台，到佢嚟真要減稅果陣，
你就拉返佢落嚟 ，可謂成也減稅，敗也減稅。其實响我眼中，韓國瑜、脫歐、卓慧思，基礎本質上冇乜點變過，變嘅，都喺果同一堆人嘅心。不過，你地呢班花生友，
唔好淨喺識得笑人地 ，你地自己咪又喺咁。
就睇 CY，
施政後期搞到左中右不討好 ，結果黯然離任，但下台後响
FACEBOOK 度出下 POST，搖身一變，就成為咗藍營嘅寵兒。佢狠批果啲乜協、乜果日報、乜港電台之類，雷厲風行。不過大家似乎已經唔記得咗，2014 年佔中事件，正正就喺响佢任期內發生，當時班乜協乜報乜電台，點樣洗腦啲年輕學生，已經喺眾所周知，而佢响佔中事件後嘅餘下任期內，對呢班團體同機構，都喺無能為力。由 2014 年佔中發展至 2019 年黑暴事件，毒害咗整整一個中學年代嘅年輕人，CY 自己都喺責無旁貸。大家唔好誤會，特首都有佢苦衷同難處，我唔怪佢。不過，佢對自己下一屆政府嘅言論，就似乎唔太體諒啦。
所以我對前兩任特首嘅睇法，喺唔會就個別事件或政策而改變，因為我嘅著眼點，
喺佢地最致命嘅要害 ，而呢啲要害，喺直接由佢地作為特首嘅初心衍生出嚟，上至施政，下至一言一行，表露無遺。正如林鄭後期嘅公開言論，
可以咁冇 HEART ，當然唔喺因為佢就嚟卸任，至於點解，就留返俾各位自己思考。
中國抗疫嘅初心 真喺唔好意思，越扯越遠添。講返抗疫，原來身為「
死守一族 」，的確可以體會到好多嘢。唔單止微觀嘅人心，同社會氣氛嘅變化，甚至連宏觀嘅國際關係，都可以感應得到。上年年初，一眾海外媒體，
包括紐約時報、經濟學人等 ，紛紛發文狠批中國嘅「
動態清零 」防疫政策，講成喺冷酷自私、自我封鎖、拖垮世界經濟等。外人用咁嘅眼光睇我地嘅國家，跟上文提到我地死守派面對嘅果種「
歧視 」，喺唔喺好類似？佢地咪一樣喺果種反應：
使唔使呀 ？！所以話，就算我內地朋友唔夠你多，睇嘅內地資訊唔夠你廣，我都比你了解中國點解要行「
動態清零 」，唔喺因為乜嘢紅粉、乜嘢盲撐，而喺簡單呢四個字，「感同身受」囉！
呢個世界，喺充滿假象，同無數謬誤。記得响《
緣結．天璣 》一文裡面，我話過，
要用心體會，從最基礎方面去了解 。用心體會，即喺就算你同對方嘅性格好唔同，甚至完全相反，都要有能力做到感同身受。而所謂最基礎方面嘅意思，就喺對方响果件事物裡面，最基層不變嘅理念，亦即喺對方嘅初心。中國抗疫嘅初心，其實好簡單，正如習主席响佢《
新年賀詞 》裡面話，要最大限度保護人民生命安全同身體健康。呢個絕對喺惟一，別無其他，但唔知點解，好多人總喺要將咁簡單同順理成章嘅事情複雜化，喺都要加啲陰謀論，例如話乘機閉關鎖國，永久同世界脫勾等。再唔喺，就撈埋哂坊間盛傳中共內部果啲乜叉官場八卦嘢入去。就好似二十大裡面，
胡前主席被帶走事件 ，啲花生友都唔知睇得幾開心，個個當哂自己喺福爾摩斯。我話呢啲花邊嘢，影響唔到宏觀大局，完全冇興趣。跟住就即刻俾人寸我唔了解中國，盲撐習主席喎！真喺無言。其實胡前主席有出席二十大，仲坐响習主席旁邊，已經代表咗好多嘢，唔使再諗多。你地究竟想就呢件事，證明啲乜？
不如我打個比喻，你喺一名投資者，你會憑乜嘢，去考慮買一間上市公司嘅股票？你買咗一隻股票，我問你，點解對呢間公司咁有信心？你話睇過哂佢嘅往績同未來大計，前景應該幾好。跟住我再問，你有冇派探子，查過呢間公司內部果啲辦公室政治？有冇搵人訪問過果度啲員工，鍾唔鍾意佢地嘅管理層？你知唔知道有人話，現任個 CEO，同前任 CEO，關係唔太好？跟住你話，現任 CEO 做咗十年啦，前任十年前已經退咗休，呢啲嘢，知嚟做乜？吓？你連啲咁緊要嘅嘢都唔關心，就走去買人地嘅股票，乜原來你投資，咁盲目架？！
我同佢地講，中國喺唔會閉關鎖國，阿爺亦好清楚，躺平只喺時間問題，而我亦特別指出，清零，先至喺最難，躺平，㩒個掣就得。當時佢地唔知我講乜，直到最近，內地「
新十條 」出台，跟著國家以排山倒海之勢，極速躺平，全球譁然，可謂嘆為觀止。呢次世界各地，驚到想死，
齊齊收緊對中港嘅入境限制 ，咦？佢地唔喺個個早就躺哂平咩？驚乜？你地班花生友，俾人呃咗啦！阿爺話，最後，我話事！如果到今時今日，你地都仲未摸清，阿爺究竟搞乜，
咁就算你有好多內地朋友，睇足哂所有內地資訊 ，你對內地政策嘅了解，都仲喺好貧乏。其實，堅持三年「
動態清零 」，就喺為咗今日呢一戰做準備，目的喺造就一系列成熟嘅地利同人和，儲足條件以最短時間，同最少影響，極速與病毒共存。天時一到，所謂，萬事俱備，只欠東風。咁究竟東風，即喺個天時，喺乜嘢？春運囉！
過氣大師之阿茂整餅 講返香港，舊年二月份，第五波疫情大爆發，
醫療系統崩潰 。記得當時我同朋友吹水，話其實香港嘅醫療質素，
都仲喺响世界前列 ，即刻俾人寸爆，不過我都懶得去解釋，有陣時，
風頭火勢 ，你講乜人地都聽唔入耳。事實上，
第五波喺政府低估咗變種病毒嘅傳播力 ，以致後知後覺，响冇足夠準備下，確診人數成支火箭咁急升，乜嘢醫療系統，都注定要崩潰。但世人總喺鍾意將啲似樣但又唔同嘅事物混為一談，尤其喺啲政客，將醫護界嘅人手不足，
講到完全喺醫生嘅保護主義問題 。其實所謂人手不足，
主要喺指公營醫療系統 ，公立醫院來者不拒，不論貧富，都喺收你一百幾十，你肯等就得。平嘢，又點會有人珍惜，用得唔好嘥嘛！醫生工作量大，壓力大，又得唔到市民嘅尊重，儲足資歷自然就轉職去私營機構。呢個喺惡性循環，所以公營醫療人手不足，喺注定嘅，永遠冇辦法解決。
早前盧局長透露，政府正研究立法要求合資格醫護人員，
响公營醫療機構服務一定年期 。久違嘅「
過氣大師 」响 FACEBOOK 專頁出文，
取笑盧局長阿茂整餅 ，留唔住反而推走人才。過氣大師果然人如其名，落得連最基本嘅因果關係都搞唔清。不過我亦好想知道，公營醫療响堅持低收費又來者不拒嘅服務條件下，大師究竟有乜嘢妙計，可以解決長期人手短缺嘅問題，冇嘅話，就唔該出少句聲。其實，盧局長呢鋪雖然算唔上喺上策，但都只喺冇辦法中嘅辦法，夠膽做啲咁唔討好嘅決定，我反而幾欣賞。講到阿茂整餅，我記得大師在位果陣，
曾經話向全港打工仔嘅強積金戶口，注資六千蚊喎 ！結果當然喺被圍攻，嗱嗱嗱，呢隻先至喺真正嘅阿茂整餅！
如果你問我，點睇【
盧寵茂 】局長，我會話，自阿超上任以嚟，我期待佢「
超人嘅能力 」，至今仲未見到，不過我認為，到目前為止，佢最大嘅功績，就喺委任咗盧寵茂呢位醫務衛生局局長，因為盧局長喺我見港府現屆官員裡面，最亮麗嘅一位。我之所以能夠俾到佢咁高嘅評價，喺基於我對佢嘅充分了解，完全睇通哂佢嘅基礎理念。你地可能會問，我憑乜嘢咁了解佢？好簡單，因為呢個人，永遠將自己一切真實諗法，寫哂响塊瞼度，你睇佢講嘢，喺好舒服，冇需要陰謀論，亦唔使諗多，佢同
城府深嘅阿超 ，完全喺兩類人。所以阿超真喺要保住呢隻頭馬，唔好啲好嘢就第一個彈出嚟宣佈，衰嘢就留返俾下屬頂。
話說盧局長，曾被封為「
醫衛局戰狼 」，無他嘅，佢認為啱嘅，就要一步做到底，絕不怠慢，唔啱嘅話，就直斥其非，一分面都唔會俾。既然要做自己認為正確嘅事情，
當然唔會為咗討好邊個就退縮 ，响佢眼中，
官僚 ，完全唔會喺阻力，而香港政府，就正正需要呢一種人。
就好似廢免針紙敗訴事件 ，NO PROBLEM，
叫老細修例囉 ！
你鬧佢輸打贏要咩 ？佢真喺話知你，做到嘢就得啦！最近，
有四個月大 B 女接受換心手術 ，由內地死亡幼兒摘取心臟，到運抵香港兒童醫院手術室，都只喺用咗唔夠三個鐘，當中究竟要通過幾多關卡同阻力？只要有一絲官僚，個 B 就喺咁先。不過，
有唔知乜醫學友 ，批評話呢個喺唔好先例喎，佢直頭懶得同你拗，
你某醫生代表乜水 ？講真，如果今屆醫衛局局長，唔喺盧寵茂，唔知個 B 女嘅命運，將會喺點？
盧局長嘅抗疫初心 你可能會問，我憑乜嘢知道，呢單嘢一定喺局長嘅功勞？原來早响
2019 年 ，盧寵茂已經積極推動緊呢樣嘢，不過，當時港大醫學院院長梁某，
就送咗隻豬心肝俾傳媒 ，話希望日後人類可以利用科技，去創造器官治療疾病喎！我唔可以武斷，梁某究竟有乜居心，但未來科技，講就好聽，圈下粉就得。未來歸未來，今日歸今日，你今日要救人，等到你果啲未來科技 READY，恐怕 B 女已經賣咗蛋。
講到圈粉，原來另一位梁某，都有幾多粉絲。話說三個月前，
即喺我上面話 ，社會輿論熱血沸騰要求復常果陣，呢位醫管局前行政總裁，
响 FACEBOOK 公開發文 ，引用第五波第二期嘅數據，達至新冠死亡率同流感相若嘅結論，仲配以《復常之路》為題。其實佢呢個 POST，我第一眼望落去，就已經覺得好唔妥。佢引用果個時期，喺响保守嘅防疫政策環境之下嘅數據，一旦復常，到時個死亡率，仲會喺一樣咩？仲有，梁某話哂都喺一個有影響力嘅公眾人物，如果市民真喺如佢所講，當正新冠喺流感，佢地真喺會連疫苗都唔再打，因為有好多市民，從來都唔去打流感針。咁就算你响自己個 POST 下面，加返個括弧備註，呼籲一下啲人打針，有 Q 用？
所以唔難理解，點解盧局長咁光火，
隔日就出咗篇長文去反駁 ，隻梁某自己唔反省，
仲好寸人地拖復常後腿 。不過好奇怪，我有唔少朋友撐梁某，話佢專業，反而盧局長篇長文，有理有據，從多角度分析，點解大家絕對唔可以視新冠為流感，但就俾佢地講成喺垃圾，又話人地玩文革式批鬥之類。我知道社會上有啲人，將盧局長標籤成紅粉，話佢乜叉都唔做，坐响度等阿爺指示。我為局長講幾句公道說話啫，就俾人話我紅粉愛紅粉，
又一個吹脹 。我埋解，大家都好渴望復常，但喺有啲嘢，唔可以太過份。
依我所見，盧局長絕對唔喺紅粉，佢由始至終，都堅守著同一個理念，呢個喺佢自己嘅理念，亦即喺佢抗疫嘅初心。只要大家心水夠清，就會留意到，佢幾乎每次，都話要睇住個醫療系統做嘢，
最近果次都一樣 ，唔單止為
體恤前線醫護人員嘅努力同付出 ，仲有，如果香港嘅醫療系統崩潰，除新冠病人外，其他市民嘅生命同健康，都會受到威脅。所以，醫療系統嘅壓力，先至喺本地最貼地同重要嘅參數，就算有乜嘢科學期刊，乜嘢專家，乜嘢研究或統計數據，話新冠死亡率已經降至零，但香港嘅醫療系統，都仲喺因為新冠疫情爆發而崩潰，咁呢個所謂「零」，又有乜嘢意義？
最近，有內地專家話，可以將 Omicron，當成感冒一樣平常心看待，就連鍾南山都話，新冠肺炎，應該改名為「
新冠感冒 」喎！
但局長仍然堅持 ，新冠非流感嘅睇法，由此可見，佢絕對唔喺一件紅粉。咁唔通局長抗疫嘅初心，本來就喺錯嘅？
定喺已經不合時宜 ？非也！我想再反問一下大家，香港公營醫療系統，
低收費、來者不拒 ，呢個服務條件，改唔改得先？
年輕護理嘅故事 我認識一位年輕人，佢中學畢業後加入咗
青航計劃 ，响一間安老院舍任職護理員。可能因為佢喺院舍惟一嘅男護理，除咗照顧工作之外，有院友患病，佢都會被揀中去陪診，即喺負責帶病人出入醫院，同陪伴診症。如果須要入院，佢會等到院友屋企人嚟到，或者成功入住病房為止。所以佢可以話喺醫院急症室嘅常客，一等就幾個鐘到近十個鐘不等，院舍只會俾佢補鐘，唔會有加班費。隨著港府於十二月逐漸
放寬防疫措施 ，香港嘅
單日新冠確診數字與日俱增 ，安老院舍陸續出現
疫情大爆發 。佢果間院舍，當然亦唔例外，最先兩位員工確診，跟著就開始有老人家陽咗。
正當外面步入復常，大家普天同慶，難得相聚飲酒作樂，三五知己睇世界盃，
慶祝阿根廷奪冠果陣 ，換嚟嘅，原來就喺佢地嘅戰時狀態。院舍員工、院友陸續確診，一個又一個員工告病假隔離，人手嚴重短缺，而佢幾乎隔日就要帶確診者入院，全副保護衣長時間待响急症室嘅新冠確診區。某星期二早上，又一位院友陽咗，但呢位老人家冇屋企人過嚟，結果佢响確診區度由朝早十點陪到第日凌晨兩點，午餐晚餐都冇食，返到屋企瞓唔夠兩粒鐘又要起身返工。跟住個星期五，佢終於確診，無他嘅，確診區喎！保護衣又唔喺太空衣，除非你唔呼吸。
雖然喺意料中事，但佢就錯過咗星期六嘅考試，屋企又有位八十幾歲嘅祖母。當日香港嘅確診數字，
突破兩萬宗 ，可能因為人手緊絀，遲遲未有接送到隔離中心嘅安排，結果家居隔離，响自己睡房渡過咗一個孤寂嘅聖誕節。佢好快康復，第五日就完成咗隔離，終於可以復常啦！不過，佢嘅所謂復常，只不過喺返番入去個戰場度啫，同坊間所理解嘅復常，當然喺天淵之別。錯過咗嘅試，可以補考返，但佢個八十幾歲嘅祖母，就確診咗。
所以唔難理解，點解呢個行業流失量咁大，尤其喺依家啲年輕人，寵慣咗嘅新一代，點會揀呢一行。佢有好多同學、同事，都捱唔住離咗職。作為醫護界最基層，薪酬低、待遇薄，但就承擔著非常嘅責任，而社會又點樣看待佢地？有冇尊重過佢地嘅付出？好多人將自己嘅父母送入老人院，以為俾錢就盡咗做仔女嘅責任，平日不聞不問，出咗事就大聲投訴。最近，見盧局長不時掛响口邊，
話香港嘅醫療系統，正在承受著沉重壓力 ，呼籲市民慶祝之餘不忘防疫，你地會唔會覺得佢掃興？會唔會質疑佢喺咪又想收緊政策？
公立醫院急症室爆滿 ，醫管局呼籲非緊急病人，考慮到普通科門診或私家診所就診，唔知道又有幾多人肯合作？
响整整三年嘅抗疫過程中，醫護界角色舉足輕重，盧局長有句說話，令我印象深刻。佢話，
只有醫療復常，先至喺真正嘅復常 。我想請問各位，當你地為阿根廷隊舉柸，
慶祝人地奪冠果陣 ，有冇順便為香港嘅醫護人員，舉多柸？有嘅話，請留個言，我為你再乾一柸。
心之歌 响呢個元旦日凌晨，夜闌人靜嘅此時此刻，我想同大家分享一首《
瑟魯之歌 》（
テルーの唄 ）。呢首喺 2006 年
宮崎駿 長子
宮崎吾朗 執導嘅動畫電影《
地海傳說 》嘅插曲，歌詞話說曾被質疑跟詩人
萩原朔太郎 一首題為《
心 》（
こころ ）嘅詩作非常相似，而歌中亦對「心」作出咗多次提問，可以話喺一首《心之歌》。《瑟魯之歌》主要分三節，總結為無法休息嘅老鷹、無人撫摸嘅花朵、及無話可說嘅同行。
隨著中港兩地走向復常，我相信 2023 年，一切將會好起嚟，不過我都喺跟大家分享咗呢首帶孤寂同悲傷嘅歌曲。我想講嘅喺，响好多人見唔到嘅復常背後，有一班醫護人員，佢地無法休息、無人關心、亦無話可說，而我地嘅普天同慶，就喺用佢地嘅痛苦換返嚟。冇佢地嘅犧牲，我地無法復常，雖然我地未必睇得見佢地，但絕對唔可以反咬佢地喺復常嘅絆腳石。
記得响《
緣結．天璣 》一文裡面，我話有時會反問自己，
寫咁多嘢，究竟為乜 ？就好似《
初心 》序章尾段咁講，
呢條問題嘅答案，就喺我出文嘅初心 。寫文的確喺一個幾孤獨嘅過程，《初心》系列已經寫到第三篇，究竟有幾多人，明白我個中心意？世界嘅巨變、社會嘅巨變，令到好多人嘅「心」變咗質。無論任何國家、任何地區，一旦大部份人嘅「心」變黑咗嘅話，仲有乜嘢前途可言？《瑟魯之歌》詞中反覆提問，將心比喻成乜嘢好呢？呢個亦喺我想俾大家反思嘅問題，你地會將自己嘅心，比喻成乜嘢？不如簡單啲，各位可以做個小測試，就五年前
潘曉穎被殺一事 ，如果今日潘媽又走出嚟為個女再討公道嘅話，請問你地發自內心嘅第一個反應，會喺乜嘢？
最後我祝各位，身體健康，心想事成，平安快樂。亦祝願廣大祖國同胞，尤其喺我地香港人，充滿期昐地走向復常，為此興高采烈之時，勿忘初心！
《
瑟魯之歌 .....（點擊播放 ） 》》》
在近黃昏的雲層上 夕闇迫る雲の上 
App下載
